Tuesday, 6 January 2026

"एक हार पछि एक जित आउँछ"


एक रात बिलाइजान्छ, एक दिन आउँछ

चकमन्न अध्याँरो आउँछ, झिसमिसे उज्याँलो आउँछ

ओरालो आउँछ, उकालो पनि त आउँछ

हो एक हार पछि जित आउँछ।।


हरेक हरेशपछी चरेश नै चाहिन्छ भन्ने छैन

चरेश नचाखिकनै सफल हुने आश आउँछ

हो बिचमा पर्खाल आउछ, पर्खाल नाघ्न डर आउँछ

तर एक हार पछि जित अवश्य आउँछ ।। 


हो कालो अन्धकार आउँछ, निडर भएर डर आउँछ

जुन्किरी खोज, धिपिकधिपिक उज्यालो बाल्दै आउँछ  

सलाई दाउरा खोज भर्भर गर्दै आगो मुस्लो भएर आउछ

एक हार पछि एक जित आउँछ ।। 


चिसो आउँछ तातो खोज, तातो आउँछ चिसो खोज 

आउनलाई जे पनि आउँछ, बस समाधान खोज 

एउटा कुरा मात्र नबिर्स जहिले पनि जहाँ पनि 

एक हार पछि जित अवश्य आउँछ।।


#poetry🥀 #struggle #success

Tuesday, 28 May 2024

" मन मुला मनै त हो "

जम्मा दुइ दिन  भाथ्यो खुसी भाको 

खै के झोंक चल्यो आखिर 

खै के कुरा सम्झ्यो आखिर 

अध्यारिन थाल्यो, आकाश उज्याँलै थ्यो 

उस्माथी मात्रै किन बादल छायो

आँखा टिलपिल गर्न थाल्यो 

छाती पिरो हुन थाल्यो श्वास अब रोकिएलाझै भो

आँखाको मुल फुट्नै के लागे थ्यो 

वरीपरी देख्यो जमात मान्छेको 

तुफान कुदो अनि आफ्नो कोठातीर  

चुकुल लगायो , लाग्यो लागेन एकफेर चेक धरी गर्न भ्यायो 

अब त के चाहियो र उस्लाई 

त्यस राज्यको राजा उहि हो

बत्ती पनि नबालि पल्ट्यो ओछ्यानमाथी

अनि चिच्यायो बेसरी , पड्कायो ज्वालामुखी

गर्जायो छानीछानी कालो बादल मनको

अनि आँखाबाट बर्सायो नुनिलो मुसलधारे पानी 

कहिलेदेखिन् पो हो अमिलो भैबसेको कुण्ठाको 

हुन्छ कसरी यति बिघ्न परिवर्तण

बुझ्नै साह्रो गाह्रो छ हौ आखिर

मन मुला मनै त हो ।


दुखी देखिराथ्यो धेरै दिन देखिन्

खै के हावा चल्यो आखिर 

खै कुन हावाले छोयो आखिर 

खै कहि कतैबाट कैलाश चियाको चुस्की भेटायो कि 

वा कैलाश पर्वत बाटै सिधै उसैलाई खोज्दै हावा आइपुगो

एक्कासि खुसी पो देखिन थाल्छ बा 

बगैंचामा जान थाल्यो हेर हेर 

फुलहरु सँग गाउन थाल्यो, फुलहरुसँगै नाच्न थालाे 

खै के रुप धारण गर्यो यस्ले आज 

उर्वसीले मोहनी मन्त्र पो फुकिन् कि 

वा उस्को राजधानी अमरावति भैगो अनि उ स्वर्गको राजा

वा कुबेरको खजाना भेटिगो अनि उ अलकापुरीको राजा 

हुन्छ कसरी यति बिघ्न परिवर्तण

बुझ्नै साह्रो गाह्रो छ हौ आखिर

मन मुला मनै त हो ।

Thursday, 9 March 2023

" मुर्ख मनुष्य ! "


 उदाउनुपर्ने  सुर्य हैन 

यो किन उदाइरहेछ

मुर्ख मनुष्य ! 

चम्किनुपर्ने  जुन हैन 

यो किन चम्किरहेछ 

मुर्ख मनुष्य ! 

यो आज सुर्जे हुन खोजिरहेछ

यो आज चन्द्रे हुन खोजिरहेछ ! ! 


यो घोर कलियुगमा जता हेर्यो झुठ मात्रै देखिन्छ 

यो किन सत्यहरिश्चन्द्रजस्तै सत्यवादी देखिदैछ,  

मर्यादा पुरुषोखत्तम हरु मात्रै देखिन्छन् वरीपरी 

अनि यो किन रामचन्द्रजस्तै मर्यादापुरुषोत्तम देखिदैछ

धर्म हराइ सक्यो  अस्तिनै

जो छन् त्यो पनि धार्मिक ढोङ्ग वाला छन्

कौरवैकौरव यत्रतत्र सर्वत्र छन् 

यो किन युधिष्ठिर झै धर्मनिष्ठ देखिदैछ

केहि  केहि खोट छ त आखिर

केही अरुभन्दा असल  फरक छु भन्ने  देखाउने हरुमा पनि 

निस्खोट हुनु एकमात्र खोट हो

यस्को !  

यो पागल हो बहुला हो दुनियाँ भन्छ

हो  पागल हुँ बहुला हुँ  खुद भन्छ ! 

घडी समेत उता चलिरहेछ अर्कोतिर

यो किन दुनिया विपरीत चलिरहेछ

मुर्ख मनुष्य ! 

मुर्ख मनुष्य ! ! 

Monday, 6 February 2023

" नयाँ कविता "




 सँग एउटा पुरानो दराज  

जसमा राखेको थे मैले

केहि थान मेरा पुराना कविताहरु 

दराजले धुलो रङ्गमै रमाउन सिकि पो सकेछ

प्रथमत दराजको बाहिरी धुलो पुछे

हल्का रिसाउदै धुलाम्मे दराज करायो 

आँखा पनि धमिला धमिला भैसकेछन उस्का

अनि के पो चिन्थ्यो मुलाले मलाई

दराज खोले माकुराका जालाहरु हटाए 


दराज खोली कुनै दिन बिर्सिदा

एउटा मुसो

मौकाले छिरेछ कविता पढ्न भनि 

 निस्किन नपाउदै दराज बन्द भैदिदा 

कैद भएछ सदाका लागि

त्यै दराजभित्र

 टुक्राउन थालेछ 

मैले लेखेका कविताका शब्दहरु

एकएक गरी

कैयन कविताहरु धोस्तै बनाएछ

खाइपचाई मल पनि बनाई 

बाहिर निस्किने बाटो नपाई

उकुस्मुकुस्ले भित्रै देह त्यागेछ

डुब्नुडुबेछ बिचरा कविताको गहिराइमा 

फेरि कहिले नउत्रीने गरी 



मुसाले टुक्रा  मल बनाउन नभ्याएको 

एउटा सग्लो धुलाम्मे कविता उठाए 

धुलो टकटकाए फु फु गरे

सफा कपडाले पनि पुछे

हल्का पानी भिजाई निचोरी ओरी

ओसिलो कपडाले फेरि पुछे 

त्यसपछि हल्का प्राइमर दले

अनि पोतिदिए निलो पालिस 

 सुकाइदे लगेर घाममा

अनि सवारी भए घुम्न कतै टाढा 

सन्ध्याकालमा घर फर्किए  हेरे 

 म्या ! दुरुस्तै नयाँ कविता पो बनेछ 

Wednesday, 21 April 2021

"बनै खायो डढेलोले,मनै खायो त्यै मोरीको पापि मायाले"

 


एक
 झिल्को आगोको
खै कताबाट उडेर आयो

एक भाग हावाको

एक भाग बिद्वान मानव 

एक भाग सुकेको पात

एक भाग निष्ठुरी वर्षा

सबैको मिलेमतोमा

कसैले दुई नम्बरी काम गरेजस्तो

कसैले दुई नम्बरी काममा सघाएजस्तो

कसैले आँखा चिम्लेजस्तो परिस्थितिमा

त्यो आगो दनदनि बल्यो बनमा

 बनै खायो डढेलोले 



एक झिल्को रिसको

खै कुन कुनाबाट जागेर आयो

एक भाग   मेरो मन

एक भाग त्यै मोरी  त्यै मोरीको मन

एक भाग औधि लाग्ने त्यै मोरीको माया

एक भाग दुनियाँ दिवाना

सबैको मिलेमतोमा

कसैले दुई नम्बरी काम गरेजस्तो

कसैले दुई नम्बरी काममा सघाएजस्तो

कसैले आँखा चिम्लेजस्तो परिस्थितिमा

त्यो आगो दनदनि बल्यो मनमा

 मनै खायो त्यै मोरीको पापि मायाले  


Thursday, 12 November 2020

" बन्द चौध को वार्ता "



म एक बन्द कोठामा 

बन्द सत्र नै नभएनी 

बन्द चौध को वार्तामा छु
बन्द कोठा मात्रै हो
बन्द वार्ता मात्रै हो
हावा बन्द छैन 
पानी बन्द छैन
उज्याँलो बन्द छैन
मेरा भावनाहरु बन्द छैनन्
मेरो मुटु बन्द छैन
मेरो श्वास बन्द छैन
मेरो हाल बन्द छैन
मेरो चाल बन्द छैन ।

बन्द चौधको यस बेलामा
कसैलाई जित्नुछ
पछ्छार्नुछ, माथ लाउनु छ
आँखाले सजिलै नदेखिने 
शत्रु माथि विजय पाउनु छ
जमानामा यस्तै अदृश्य कुरालाई जितेकै हो
दुख, चोट, बेदना, बिछोड
कहिले कस्ले देख्न सकेको थ्यो र ? 

Tuesday, 22 September 2020

" नयाँ कविता "


म एउटा नयाँ कविता लेख्छु, 

जसमा शिशिर मा वसन्त 

र वसन्तमा शिशिर होस् ।

जसमा प्रेमिल समिप्यता होस्
खुसी होस् 
हाँसो होस्
सुख होस्
उन्नती होस्
बस्,
बेदना नहोस्
रोदन नहोस्
दुख नहोस्
बिछोड नहोस् ।

होस् त 
संसार जित्ने अडिग लक्ष्य होस्
कुवा भित्रकै भ्यागुतो नहोस् ।

होस् त
माथी उठ्न जान्ने भगवान होस्
शैतान या नादान नहोस् ।

होस् त
नयाँ कविताजस्तै उत्कृष्ट होस्
पुरानोजस्तो निकृष्ट नहोस् ।